Je stajnje zmužitych ludźi, kotřiž sej zwaža, stare twarjenje ponowić abo dodźeržanu bróžnju saněrować. Cyle hinaše je wužadanje, nimale rozpadany hród wobnowić. Na tajki projekt staj so před sydom lětami serbskaj mandźelskaj we łužiskej jězorjenje zwažiłoj. Nětko je jeju předewzaće zwoprawdźene.

Krynhelecy (SN/MWj). Někotre skromne pokiwy w socialnych syćach a w interneće na dźeń wotewrjenych duri w hrodźe w Pakosnicy, němsce Schadendorf pola Krynhelec (Kringelsdorf) blisko Hamora běchu wšitko, štož je na to pokazowało, zo móžachu sej zajimcy sobotu njewšědnu zajimawosć wobhladać. Tam bě přistupny hród, kotryž je dawkowy poradźowar Enrico Kral ze swojej mandźelskej Annett minjene lěta wuběrnje saněrował a jemu móhłrjec nowe žiwjenje zadychał. Hižo znazdala bě serbska šlagrowa hudźba słyšeć, z wokna zmawo­waše nimo cyrkwinskeje tež serbska chorhoj, pozdźišo je farar Gabriš Nawka dom požohnował a wječor postara so Dr. Taste tež ze serbskej hudźbu wo zabawu.