Planowany dróhotwar w Radworju (SN su rozprawjeli) zahaja štyri tydźenje pozdźišo, hač planowane. Z toho wurosćace problemy drje hodźa so rozrisać, su pak za někotrych wobdźělenych přiwšěm wužadanje.

Radwor (UM/SN). Šok wšak to za Radworsku wjesnjanostku Madelaine Rynčowu runjewon njebě, jako wona z Budyskeho krajnoradneho zarjada zhoni, zo Dróhu dr. Marje Grólmusec pozdźišo wutwarjeć započnu. „Dyrbiš stajnje z tym ličić, zo material dypkownje njedochadźa“, wona měni. A tola přinjese tele wuwiće mały problem ze sobu. Přetož poprawom měješe so 31. meje mejemjetanje wotměć. „Dokelž je chětro njewěste, kajke połoženje potom budźe, je so młodźinski klub rozsudźił, mejemjetanje štyri tydźenje zašo přewjesć, potajkim 3. meje“, wjesnjanostka rozprawja. Mejemjetanje přiwabja po dotalnych nazhonjenjach stajnje wjele ludźi. Nětko je potajkim do zahajenja twarskich dźěłow přewjedu.