Pančicy-Kukow (SN/MWj). Z wotměnjawym popołdnjom, koncertom dujerskeje hudźby, nalětnimi wikami a poskitkami za swójby z dźěćimi je klóšterska zahroda Křesćansko-socialneho kubłanskeho skutka (CSB) njedźelu swoju lětušu sezonu zahajiła.
Štom lěta – lětsa je to wosyca (Zitterpappel) – sadźichu prěni raz na nowym městnje, mjenujcy při šćežce, wjeduceje wot Kanečanskeho puća do Lipja. Wobstarałoj staj to mjez druhim celerarka (za hospodarstwo zamołwita sotra) klóštra Marijina hwězda Tadeja Zelnakec a prezident Sakskeho krajneho zarjada za wobswět, ratarstwo a geologiju Heinz Bernd Bettig. Tam budu přichodnje wosadźane štomy lěta zawěsće lěpje rosć, hač te, kiž buchu před 25 lětami direktnje w Lipju mjez Klóšterskej wodu a łuku sadźane. Tam maja z jednoho boka přemało słónca, čehoždla křiwje rostu.
