Štóž hdys a hdys přez Čorny Chołmc jědźe, móže takrjec přihladować, kak tam wulki twarski kompleks nastawa. To je twarnišćo projekta Smart Mobility Lab (SML) Drježdźanskeje Techniskeje uniwersity. Njedźelu smě so tam kóždy rozhladować a informować.

Čorny Chołmc (SN/MWj). Na dźeń wotewrjeneho twarnišća su zajimcy njedźelu, 28. junija, wot 11 do 17 hodź. do Čorneho Chołmca přeprošeni. Tam dóstanu wopytowarjo prěni raz wobšěrny dohlad do po wšej Europje jónkrótneho slědźenišća Smart Mobility Lab za splećenu a awtonomnu mobilitu.