Za dźěći w serbskich katolskich wosadach startuje dźensa nabožny tydźeń

Budyšin (SN/MiP). Po cyłej Sakskej zahaja katolske wosady dźensa dźěćacy nabožny tydźeń (RKW). Lětuši cyrkwinski prózdninski poskitk steji pod hesłom: „Pój Mójzeso, hibaj so!“ Centralne podłožki za serbske dźěći sobu přełožiła je Lucija Škodźina, serbska młodźinska referentka dekanatneho dušepastyrstwa. W rozmołwje z našim wječornikom naspomni, zo ma lětušu temu za jara wunošnu, dokelž stej wosoba a skutkowanje Mójzesa połnej najwšelakorišich fasetow, „z kotrymiž móžemy dźěćom jara načasne pozitiwne nastorki dać“. Kaž hesło tydźenja přeradźi, je lětsa tež ćělna aktiwita wažna. Cyle wědomje chcedźa zamołwići nazhonjenje wěry z pohibowanjom zwjazować a to w přezpólnej hrě abo rejowanju runje tak kaž w małych činohrajnych kruchach abo w paslenju.