Zakładny kamjeń noweje gratownje w Słonej Boršći połožili
Słona Boršć (CS/SN). Po prěnim zarywje za nowu wohnjowobornu gratownju w Słonej Boršći, kiž bě 11. meje, je jenož mało tydźenjow zašło. Mjeztym su hižo prěnje murje z fundamentow natwarjene. Tuž je najwjetši čas, połožić zakładny kamjeń. Nimo wohnjowych wobornikow ze wsy běchu předwčerawšim tež mnozy wobydlerjo Budyšinej přisłušaceje wsy přišli, zo bychu tónle podawk sobu dožiwili. Tež čłonojo měšćanskeje rady tole skomdźić nochcychu.
Budyski wyši měšćanosta Karsten Vogt (CDU) zwěsći, zo je twar hižo derje pokročował. Tuž drje móža nazymu zběhanku swjećić a twar klětu w oktobru jeho zaměrej přepodać. W nowej gratowni budźe městno za tři hašenske jězdźidła. Před domom změja 15 parkowanskich městnow kaž tež móžnosć, wosom kolesow přizamknyć. Gratownju wuhotuja z fotowoltaikowej připrawu, na płonym dźělu pak nastanje zelena třěcha. Nimo toho budu w domje dalekubłanske rumnosće a předrasćernje kaž tež sanitarne rumnosće za muži a žony. Dźěl twarjenja budźe zjawnje přistupny a ma so za zarjadowanja wužiwać.
