Nošerjej LIPA a KIJU kooperujetej na dobro dźěći w lěćnych prózdninach

Smjerdźaca/Budyšin (SN/MiR). Pytajo w interneće za prózdninskimi poskitkami, su informacije wšelakore. Sobudźěłaćerki LIPY w Smjerdźacej šěrja je po socialnych syćach, na Instagramje abo Whatsapp. Wot dźensa hač do srjedy je tam dźěłarnička za dźěći wot wosom lět, kotrež pod nawodom Móniki Młodźinkoweje šija. Posledni tydźeń prózdnin přihotuja mjeztym hižo tradicionalny medijowy a sportowy camp, na kotrymž so 32 dźěći wot 1. do 4. lětnika wobdźěla. „Nowinka je nastawaca kooperacija ze Biskopičanskej syću za dźěći a młodostnych KiJu“, rjekny sobudźěłaćerka LIPY Michaela Raabowa na naprašowanje SN. „Pojědźemy jedyn dźeń do campa KiJu při jězorje w Němskich Pazlicach.“, wona doda. Zhromadnje z tam přebywacymi dźěćimi chcedźa zabawny dźeń dožiwić a so mjez sobu zeznać. Dale wita sobudźěłaćerka LIPY Franciska Šnablowa 6. a 7. awgusta holcy wot 5. lětnika w Smjerdźacej na dnjej połnej kreatiwnych idejow.