Kamjenc (SN/MWj). Ze zběhanku na wjacezaměrowym twarjenju su minjeny štwórtk wažny měznik při nowym wuhotowanju Jahnoweho sportnišća w Kamjencu docpěli. Budyski wokrjes a město Kamjenc projekt zhromadnje zwoprawdźatej a tak na tradicijach bohate sportnišćo saněrujetej. Na terenje sta­raja so wo moderne wuměnjenja za šulski a wólnočasny sport. Předwidźane su mjez druhim běhanska čara na 100 a 200 metrow, připrawy za běh přez zadźěwki, dalokoskok, wysokoskok a ku­lostork. Na dalšich městnach planuja mały trawnik za basketbul, wolejbul a kopańcu, rěka w nowinskej zdźělence wokrjesa.

Centralny wobstatk naprawy je nimo toho nowotwar jednoposchodoweho twarjenja. W nim budu předrasćernje a sanitarne rumnosće za holcy a hólcow. Dalše rumnosće su za Dźěćacy škitny zwjazk, kiž so wo skaterowy park stara. Tež tón sylnišo do cyłkowneho areala zapřijeja. Za to natwarja fitne­sowu šćežku, kotraž sportowu připrawu a skaterowy park zwjaza.