Budyšin (MiJ/LiH/SN). W němskich wodźiznach zemrěchu minjeny měsac telko ludźi, kaž hižo 20 lět dołho nic. Horce temperatury skićachu dobre wuměnjenja za wočerstwjenje při jězorach, rěkach abo w kupjelach. Runje ćopłe wjedro je pak tež sobu z přičinu, zo mnozy we wodźe swoje žiwjenje přisadźuja. Znajmjeńša 99 kuparjow so w juniju zatepi, zdźěla Němska towaršnosć za wuchowanje žiwjenja (DLRG). Najwjac woporow při kupanju zličichu w juniju 2003, jako 107 so kupacych zemrě.

Lětsa w juniju zatepichu so w Sakskej tři wosoby, dwě wjace hač loni w smažniku. Hakle minjenu sobotu zemrě 38lětny w jězorje njedaloko Lipska. Policija tuka na njezbožo abo mediciniski nuzowy pad. Po statistice wosebje mužojo při kupanju zemrěja. Prezidentka DLRG Ute Vogt na to skedźbni, zo běchu w juniju 90 procentow woporow mužojo. Tohorunja su zwjetša młodźi ludźo potrjecheni. 40 wot 99 zemrětych běchu młódši hač 30 lět. K smjertnym njezbožam dóńdźe wosebje na jězorach a rěkach, hdźež njejsu hustodosć wuchowanscy pomocnicy na městnje.