Towarstwo Serbski kulturny turizm poruča cile za prózdninske wulěty

Budyšin (SN). Telko prózdnin kaž dźěći drje jich starši nimaja, tola tež dźěd a wowka móžetaj wnučkam wólny čas w lěću z wulětami porjeńšeć. Wotpowědne poručenja je předsyda towarstwa Serbski kulturny turizm (SKT) Pětr Brězan wozjewił, z kotrymiž towarstwo zdobom turistiskich poskićowarjow podpěruje. Tak móhli ludźo na přikład prózdninski dźeń w Archeotechniskim centrumje Wjelcej zahajić, hdźež zhonja, kak su so Słowjenjo we Łužicy zasydlili. Hač hornčerjenje, kowanje abo zhotowjenje bumeranga – zajimcy kóždeje staroby zeznaja tam zdobom tradicionalne techniki rjemjesła. Jenož něšto mjeńšin je dyrdomdejske hrajkanišćo na arealu Stareje šule zdalene, hdźež su tež serbske powěsće zapřijate. Wosebitosć je digitalny lutk za šmóratko, z kotrymž dźěći mjez druhim małe nadawki spjelnjeja.