Koblicy (AK/SN). Hač do kónca lěta chce Kobličanske Towarstwo přećelow wlečakow wjesny towarstwowy dom ponowić. Tam změja w přichodźe nowe wjesne zetkawanišćo. „Tu nastawa rumnosć za wuradźowanja wjesneje rady, našeho towarstwa a dalšich towarstwow. Nimo toho wutwarimy mału žurlu za swjedźenje, přednoški a dźěłarnički. Dale nastanjetej rumnosć za techniku a kuchnja“, rozłoži Sibylle Babick wot přećelow wlečakow. Woni dom wot apryla w swójskej režiji saněruja. Dohromady płaći to 100 000 eurow. 30 procentow z toho zapłaći towarstwo same, 70 procentow dóstanu z programa Leader spěchowane.