Měšćanska rada twarske nadawki za Šibojski jězor přepodała

Wojerecy (AK/SN). Turistiske wuwiće zapadneho pobrjoha Šibojskeho jězora dale pokročuje. Na swojim zašłym posedźenju su Wojerowscy měšćanscy radźićeljo tři wažne twarske nadawki přepodali. Tak matej dwě funkcionalnej twarjeni nastać, při pobrjoze natwarja terasy ze skłoninami a na cyłym arealu wosadźa wšelake kerki a štomy.

Nadawk za planowanje twarjenjow přepodachu Wojerowskej planowanskej towaršnosći Bayhoys. W prěnim kroku dźe wo tak mjenowane naćiskowe planowanje. Nadawk ma wobjim 97 000 eurow. Nimo twarjenjow ma dožiwjenska šćežka nastać. Město nadźija so spěchowanskich srědkow we wobjimje 95 procentow z fondsa za strukturnu změnu. W jednym z twarjenjow chcedźa kofejownju zaměstnić, tamne ma jako wjacezaměrowy dom słužić. Twarjeni kaž tež dožiwjenska šćežka maja hač do kónca 2029 hotowe być.