Skała z kulisu festiwala (nic jenož) serbskeje elektroniskeje hudźby

Miłoćicy (SN/bn). Dotal drje najpisańši program je minjeny kónc tydźenja njehladajo na dosć dešćikojte wjedro dohromady něhdźe 500 wopytowarjow na festiwal Meta Solis přiwabił. Mjeztym wosmy raz je towarstwo samsneho mjena třidnjowske zarjadowanje pod hołym njebjom při Miłočanskej skale wuhotowało, a wospjet je zajimcam z nim přehlad aktualneho stawa sceny serbskeje elektroniskeje hudźby runje tak wobradźił kaž dohlad do mjezynarodneho wuwića na tymle polu. Zjimajo móžeš rjec, zo dominuja nadal na 1990te lěta złožowace so zynki, jako sta so techno resp. rave z masowym fenomenom popoweje kultury. Zdobom njelutuja mnozy protagonisća přiběrajcy z pokazkami na korjenje a mězniki žanra. Mjenować matej so tu předewšěm lěta 1955 w Darmstadće załožene Studio za elektronisku kompoziciju kaž tež tak mjenowany krautrock slědowaceju dekadow – bjeztoho, zo bychu so doprědkarskich eksperimentow wzdawali. Sobu najlěpši přikład sposrědkowa performance kolektiwa 1pp1, kotryž festiwal zahaješe.