Budyske hosćency maja w awgusće wosebity poskitk

Budyšin (CS/SN). 21. Budyske žonopowe tydźenje staj hišće amtěrowaca Budyska žonopowa kralowna Vivien Lenz a zastupowacy předsyda tudyšeho turistiskeho towarstwa Bodo Siegert wčera w žonopowej manufakturje na Mjasowych wikach zahajiłoj. Wone wotměja so hač do 30. awgusta. Lětsa wobdźěli so 14 hosćencow, jedyn wjace hač loni. Mjez nimi je, kaž zašłe lěta tež, zaso serbski hosćenc „Wjelbik“. Kóždy z wobdźělenych hosćencow je wosebitu swójsku jědźnu kartu zestajił a na te wašnje pokazuje, što hodźi so ze žonopa njewšědneho na taler kuzłać. Mjez druhim poskićuja samo žonopowy lód, ale wězo tež jědźe z mjasom, rybu a jejemi ze słódnymi wariacijemi žonopoweje juški. Wyši měšćanosta Karsten Vogt (CDU) při wotewrjenju měnješe, zo je „žonop dźěl našeje kultury a zo je sprjewine město žonopa dla nadregionalnje znate“.