Wosebje na wsach drje je lědma domjacnosće, w kotrejž njeje domjaceho zwěrjeća. Mjeztym zo so psyk a kóčka poměrnje husto jewitej, su bóle eksotiske zwěrjata skerje rědke. Wo nich a jich plahowarjach na wšelakich městnach Łužicy rozprawjamy w lětnjej seriji Serbskich Nowin. (5)

Wowcy plahować na našich wsach ničo wosebiteho njeje. Často wuhladaš je na priwatnych zahrodach abo na kromje pućow w mjeńšich skupinach so pasć. Ale w měsće? Utta Winzer bydli na kromje Budyšina a ma wulku ležownosć. Znajmjeńša je wona wulka dosć, zo móžeš tam wowcy dźeržeć. To wšak su tež jenož mini-wowcy družiny Quessant. To je najmjeńša družina wowcow w Europje. Pomjenowana je po francoskej kupje w Atlantiku Ile d´Quessant.