Radwor (MkWj/SN). Twarske dźěła w Radworskej křižnej cyrkwi so nachileja. Hač do kónca awgusta chcedźa wobšěrne naprawy k ponowjenju wažneho twarjenja katolskeje wosady zakónčić, hłowny twarski zamołwity Pětr Kubańk z Bronja na naprašowanje Serbskich Nowin zdźěli.

Křižna cyrkej je nimo wulkeje, lěta 1895 poswjećeneje wosadneje cyrkwje a stareje cyrkwički na nawsy třeći Boži dom w Radworju. Wona tamnišej wosadźe w prěnim rjedźe jako ćěłownja na kěrchowje słuži. Po cyrkwinskim archiwje pochadźa cyrkej z lěta 1397. Swoju dźensnišu formu je po wobšěrnym přetwarje w lěće 1888 dóstała.

Na třěše cyrkwje su w aprylu 2025 twarić započeli. Na prěni pohlad drje zdaše so wona hišće w porjadku; wokomik pak, hdyž by so prěni dešć přez nju předrěł, bě wotwidźeć. Hižo tu jewjachu so prěnje problemy. Zamołwići za pomnikoškit sej spočatnje žadachu, zo měli so stare cyhele znowa wužiwać. Te pak běchu hišće na tradicionalne wašnje do malty kładźene. Radworčenjo su naposledk swoje předstawy wo dospołnje nowej třěše přesadźili, Pětr Kubańk rozłoži.