Po lońšim wuwzaću lětsa zelowa njedźela zaso samostatna była

Pančicy-Kukow (SN/MWj). Zelowa njedźela je wčera něhdźe 850 wopytowarjow do zahrody klóštra Marijineje hwězdy w Pančicach-Kukowje přiwabiła. Organizatorojo z Křesćansko-socialneho kubłanskeho skutka ze Sonju Hejdušcynej na čole, kaž tež wikowarjo běchu z wuslědkom jara spokojom. Přinošowało je tomu přijomne suche wjedro z nic tak horcymi temperaturami kaž dźeń do toho. Dopołdnja bě so hišće dešćowało.

Zelowu njedźelu wuhotuja kóždolětnje wot lěta 1996, stajnje po swjedźenju Marije donjebjeswzaća (15. awgusta) abo na nim samym. W tym času zela swoje hojenske maćizny najbóle wuwiwaja a su tuž najbóle skutkowne, kaž Sonja Hejdušcyna rozłoži. Zela a přirodne wudźěłki běchu tež hłowny wobstatk regionalnych wikow. Na nich poskićowachu producenća mjez druhim wudźěłki z kobołka, wolije, měd, korjeniny a wjele dalšeho. Mnozy wužichu składnosć a sej tam rjany kwěćel čerstwych zelow kupichu.