Kupjeli w Kulowje a Porchowje zhladujetej rozdźělnje na lětušu sezonu

Kulow/Porchow/Budyšin (SN/StŠ). Hačrunjež njeje aktualne wjedro runjewon idealneza kupanje wonka, njeje lětuša sezona w lěsnej kupjeli w Kulowje hišće zakónčena. „Smy lětsa 28. meje sezonu zahajili a přichodny tydźeń njedźelu, potajkim 30. awgusta, ju zakónčimy. Hač do toho mamy wšědnje wotydźenja wot připołdnja, kónc tydźenja pak hižo wot 11 hodź. wotewrjene. Ze spočatkom noweho šulskeho lěta, potajkim runočasnje zo je so wochłódniło, mamy jenož hišće mało hdyž-li docyła hišće wopytowarjow“, praji Uwe Mickel, nawoda Kulowskeje lěsneje kupjele. Mjenje wopytowarjow a měnjate so wjedro pak njewoznamjenjatej, zo započnu kupjel hižo dočasnje zrumować.