Antje Meichsner je jedna z kursistkow, kotřiž lětsa we wobłuku programa Domoj hornjoserbsce wuknu. Medijowa wuměłča bydli w Drježdźanach. Pochadźa pak ze wsy blisko Łužicy. Jako młodostna měješe mnohich přećelow-punkow we Łužicy, kotrymž serbskosć tak wažna njebě. „Njejsu so z tym identifikowali“, wona zwurazni.

Hakle pozdźišo je při swojich subkulturnych aktiwitach na serbskosć storčiła, na přikład na koncerće Paula Geigerzählera. „Tón je Serb a punk a hraje husle“, a to Antje zajimowaše. Tež queerfeministiska rap-skupina Kolektiw Klanki zbudźi jeje zajim, dokelž reprezentuje rědku „mjeńšinu w mjeńšinje“. Tak dojědźe sej Antje ekstra na dźiwadłowu hru, zo by hudźbu Kolektiwa Klanki w předstajenju słyšała. Tam wona skupinu narěča.

Pozdźišo tež na festiwalu Metasolis jako hudźbnica wustupi. Festiwalowa crew napodobnješe za sebje radijo, při kotrymž so mjez sobu serbsce lóštnje komentowachu. Tam Antje prěni raz słyšeše, kak so Serbja serbsce rozmołwjeja. Najebać lóštneje situacije bě šokowana, jako zwěsći, zo njebě so dotal ženje z rěču rozestajała.