Přetwar krajneje šule za rybarjow traje dlěje hač planowane

Rakecy (UM/SN). Štóž přijědźe tuchwilu z Budyskeho směra do Rakec, tón widźi na kromje dróhi, kak twarske dźěła kołowokoło hrodu pokročuja. Tam hižo dlěje krajnu šulu za rybarjow ponowjeja. Wosebje twarjenje internata ma w směrje na dróhu cyle nowe wobličo. Swisle maja tam nětko pjeć wutwarkow, město dotal třoch. Twarjenje z NDRskeho časa tuž hnydom bóle historiske skutkuje, štož běchu sej zamołwići tež tak přeli. „W přizemju internata zatwarjamy tuchwilu estrich a w hornim poschodźe dźěłaja technikarjo“, Caroline Baer z wotrjada za zjawnostne dźěło Statneho zawoda za management imobilijow a twarstwa (SIB) dotalny staw dźěłow wopisuje. Dale wona praji: „Pod třěchu su suche sćěny nimale dotwarjene. Třěcha a kózły su hotowe,­ na fasadźe započinaja po lěćnej horcoće dźěłać. W februarje 2027 chcemy twarjenje přepodać.“