Budyšin (CS/SN/MG). Čas zastojnstwa Budyskeje žonopoweje kralowny Vivien I. so nachila. Po dwěmaj lětomaj Vivien Lenz swój ceptar sobotu nawječor swojej naslědnicy přepoda. Štó to budźe, přeradźa zamołwići sobotu 15.30 hodź. na Hłownych wikach. Druhe sakske majestosće budu tohorunja přitomne. Hižo wot připołdnja w 13 hodź. pósłanče wšelkich regionow a produktow w starym měsće wustupja. Ceremoniju mo­derěrujetaj Annett Scholz-Michalowski a wodźer po měsće Albrecht Ludwig. Wona je jedyn z wjerškow 8. staroměšćanskeho festiwala, kiž so wot 28. do 30. awgusta w Budyšinje wotměje.

Za kulisami so mnoho pomocnikow wo poradźenje festiwala prócuje. Towarstwo za turizm podpěruje město z dohromady 33 500 eurami. 120 programowych dypkow wobjimowacy program wuhotuje wjace hač 700 akterow. Za kóždu starobnu skupinu budźe tuž něšto w programje.