Boršć a ćěłozwučowanje w srjedźišću tydźenja

Kamjenc (MČu/SN). Lětuša Kamjenska Boršć steji w znamjenju žiweje zwjazanosće z domiznu a wosebiteho jubileja: Nimo­ tradicionalneju přećahow swjeća tam lětsa jubilej 180 lět Kamjenskeho ćěłozwučowanja­. Swjedźenske podawki charakterizuje sylna zhromadnosć, wšako tež mnozy wuwučowacy a šulerjo ze serbskich gmejnow swjedźenski tydźeń aktiwnje sobu wuhotuja.

Minjenu póndźelu dožiwi Kamjenc zazběh ze superlatiwom: Z 1 850 dźěćimi a młodostnymi su při wućahu z města do Boršće nowy rekord wobdźělnikow nastajili. Tale ličba skutkownje pokazuje, kak hłuboko je tradicija w šulach regiona zakótwjena. Jimace znamjo mnohotnosće a zwjazanosće skićeše morjo chorhojow: Nimo němskeje a sakskeje chorhoje słušeše tež serbska chorhoj do pisaneho wobraza.

Wčera pak stejachu stawizny Kamjenskeho ćěłozwučowarstwa w srjedźišću. Składnostnje swojeho 180lětneho jubi­leja ćehnjechu ćěłozwučowarki a ćěło­zwučowarjo we wosebitym swjedźenskim ćahu zhromadnje do Boršće.