Agrarne předewzaće Sorabija chce bywšu hródź zaso wužiwać

Hrańca (SN/StŠ). „Chcemy w našim zawodźe wot spočata přichodneho lěta w tak mjenowanym zawrjenym systemje dźěłać. To rěka, zo wšitke wotchady našich howjadow z ćelatami narunamy, kiž su so tu pola nas narodźili a wotrostli“, Chris Fabig, předsyda Sorabije agrarneje AG w rozmołwje ze Serbskimi Nowinami w Hrańcy rozkładźe. Zo bychu tule wiziju zwoprawdźić móhli, je předsydstwo ratarskeho zawoda kónc zašłeho lěta směrodajny rozsud tworiło. „Dotal naše ćelata, kotrež so tu w Hrańcy narodźa, najprjedy raz jenož prěnje štyri žiwjenske měsacy tu přebywaja. Po tym smy je na něhdźe połdra lěta, potajkim hač do wokomika, zo su połnje wurosćene dejki, do partnerskeho zawoda w regionje dali.“