Němsko-Serbske ludowe dźiwadło je minjenu njedźelu na dźeń wotewrjenych duri na Budyski hród prosyło. Tysacy hosći běchu na wjeršk na spočatku hrajneje doby přichwatali.
Budyšin (SN/DK). Něhdźe 3 000 wopytowarjow je njedźelu na dźeń wotewrjenych duri do dźiwadła na hrodźe přichwatało. Mnozy ludźo kupowachu lisćiki za předstajenja, dokelž tute za přihódnu płaćiznu předawachu.
Hosćo su nimo toho wurězki wšelakich nowych inscenacijow a małe kruchi widźeli. Mały highlight bě nowy kruch za turu po Delnjej Łužicy. Marian Bulank a Alexander Marusch staj zhromadnje hru „Dołhoź wišnina kćěje“ předstajiłoj. Prezentacija steješe zdobom w znamjenju spisowaćela Jurja Kocha, kotryž 15. septembra swoje 90. narodniny woswjeći.
Dźakowano spěchowanskemu towarstwu dźiwadła sydaštej słódny tykanc a kofej. Na hrodowym dworje předawachu praženu kołbasku. Samsny čas předstajachu na jewišću program ze wšelakimi rejemi wot Thespisoweho centruma, ze serbskej rejowanskej dźěłarničku a ze spěwami wot „Floppy Dolls“.
