Margarećina hěta dóstanje skónčnje prawe puće a kanal za wodu

Wulka Dubrawa (UM/SN). Industrijna přestrjeń Margarećina hěta we Wulkej Dubrawje je tuchwilu wulke twarnišćo. Mjez twornju zawoda Alsical a něhdyšimi socialnymi twarjenjemi wotbagruja dźěłaćerjo stare betonowe platy a je na nakładne awta nakładuja. We Wulkodubrawskej gmejnje je Margarećina hěta wažne stejnišćo hospodarstwa, wšako ma tam přeco hišće mnoho ludźi swoje dźěłowe městno. „Wobstejnosće pak hižo dlěje optimalne njeběchu“, rjekny wjesnjanosta Hardy Glausch. „Njebě prawych pućow, jenož z betonom nasypane šćežki,­ po kotrychž dyrbjachu wšón material­ do zawodow dowožować.“ Wosebje spedicije tole dlěje akceptować nochcychu. Wjacore běchu připowědźili, zo hižo k Margarećinej hěće njepojědu. Pobrachowace puće pak njeběchu jenički problem: „Falowaše system wotwodźenja dešćoweje wody a wobswětlenja“, rjekny wjednica twarskeho zarjada Uta Eckstädt. Gmejna Wulka Dubrawa a zaměrowy zwjazk za wopłóčki „Mała Sprjewja“ běštej so wjacore lěta wo to pró­cowałoj, ležownosć za to spřihotować.