Chrósćicy (SN/StŠ). Mjeztym zo dźěći Chróšćanskeje pěstowarnje nachwilnje w něhdyšej pěstowarni w Ralbicach přebywaja, wotstronjeja dźěłaćerjo w Chróšćan kołću zaměrnje škody, kotrež běše wuběžaca woda zawiniła. „Fachowcy su špundowanje mjeztym tak daloko zwutorhali kaž bě trěbne, zo bychu widźeli, kak daloko je woda w přizemju woprawdźe­ běžała. To koncentruje so na wone­ městna, na kotrež běchmy tukali, mjenujcy na zachod a chódbu. Ale tež kuchnja je potrjechena, runje tak kaž skład. Tež w rumnosćach kubłarkow a w běrowje­ wjednicy su fachowcy włóžnotu zwěsćili. Wšudźe tam smy špun­dowanje kompletnje zwutorhali. Smy pak woprawdźe wolóženi, zo njejsu skupinske­ rumnosće, hdźež dźěći dźeń wote dnja přebywaja a sej hrajkaja, wot škody­ potrjechene“, wjesnjanosta Marko Kliman widźomnje wolóženy rozkładźe.­