W Budyšinje su zajimcy sobotu z tramwajku sobu jěli
Budyšin (CS/SN). Sobotu na dnju wotewrjenych duri w Budyskej wagonowni mějachu wšitcy hoberski zajim, jónu raz za kulisy zhotowjerja železniskich jězdźidłow Alstom pohladać. Wulke syły ludźi – často cyłe swójby – přichadźachu k zawodowym wrotam na Fabrikskej. Składnostnje 180. jubileja zhotowjenja železniskich wagonow w sprjewinym měsće bě zawod wobšěrny program přihotował.
Dorosćeni zajimowachu so předewšěm za produkciski proces, kotrymž móžachu we wulkich halach krok po kroku sćěhować. Ale tež za dźěći bě zajimawe widźeć, kak na přikład nadróžnje nastawaja. Małe wopytowarjo móžachu tam nimo toho paslić a sej hrajkać.
