Awtor dźensa

Jurj Bjeńš

Jako wčera popołdnju na swojim šmóratku někotre Whatsapp-statusy přelistowach, so pola znateje žony z Němcow chětro dźiwach. Wona gratulowaše sportowym akrobatkam z Wojerec k złotej medali na swětowych mišterstwach. To wězo hnydom rešeršowach a wučitach, zo so w italskim měsće Pesare kónc tydźenja najlěpši juniorowi sportowi akrobaća zetkachu. Nona Kara a Johanna Schöne wot SC Wojerecy nastupištej w dwójce za Němsku a sej titul swětoweju mišterkow wudobyštaj. Dyrbju sprawnje prajić, zo hač do wčerawšeho scyła njewědźach, zo tajka sportowa disciplina eksistuje a zo so wona pola nas we Łužicy na tajke profesionelne wašnje wukubłuje a trenuje. Štóž chce sej raz wobě holcy wobhladać, kak elegantnje so wonej po parkeće hibatej, tón na youtube te abo tamne widejo namaka.