Twarske dźěła za park wětrnikow pola Slepoho pokročuja

Slepo (AK/SN). Za prěni wotrězk Sle­pjanskeho parka wětrnikow twarske dźěła­ po wuprajenju inwestora, firmy Enercity, dale pokročuja. Tole zdźěli Slepjanska gmejna w swojim aktualnym hamtskim łopjenu. „Na Mułkečanskim nasypje su mjeztym wšitke štyri fundamenty za milinowe wětrniki z betonom wukidali. Tež na přepinarni w Syjku (Graustein) a na milinowej čarje dale dźěłaja“,­ tak gmejna.

W awgusće nasta w Mułkecach městno za překładowanje wokřidłow. Wot kónca oktobra wokřidła sem přiwjezu a tu najprjedy raz składuja. Pozdźišo je wottud na nasyp dowjezu. Hižo spočatk oktobra transportuja do Mułkec dźěle za wěže, generatory a tak mjenowane gondle. Tele transporty přijědu zwjetša w nócnych hodźinach. Wone wjedu hnydom na nasyp. Dokładne terminy hišće znate njejsu. Předewzaće pak chce wobydlerjow sčasom informować.