Financna mizera přičina za rozsud Budyskeho wokrjesneho sejmika

Budyšin (SN/jp). Wokrjesny sejmik z krajnym radu Udom Witschasom (CDU) na čole je so wčera po třoch měsacach zaso zešoł. Na žurli krajnoradneho zarjada na Budyskej Dwórnišćowej su radźićeljo mjez druhim wo Muzeju zapadneje Łužicy w Kamjencu a wo syći chorownjow w serbskim sydlenskim rumje wuradźowali. Na spočatku­ posedźenja rozžohnowa Udo Witschas serbskeho radźićela Alojsa Mikławška (CDU) z gremija. Starobnych přičin dla je so wón rozsudźił, swoje zastojnstwo wotedać. Jako jeho naslědnik bu wčera wjesnjanosta gmejny Haselbachtal Tobias Liebscher spřisahany.