Pančicy-Kukow/Lubij (SN/StŠ). Hdyž so serbscy seniorojo na měsačny škot zetkawaja, njeje Měrćin Nowak jenož jedyn z kartyplacarjow, ale ma stajnje tež organizaciju sobu na starosći. „Sym nadawk wot Chróšćana Jana Macki přewzał. Njemóžu pak docyła dokładnje rjec, kak dołho­ nětko hižo serbski seniorowy škot sobu organizuju a poprawom njeje to tež docyła wažne. To najwažniše mi je, zo so měsačnje zetkawamy a serbsku zhromadnosć při najrjeńšej zabawje, při škoće hajimy.“

Hižo wot dźěćatstwa hraje mjeztym 78lětny škot. Spočatnje doma w Nowej Wjesce z nanom a bratrami, pozdźišo tež we wjesnej zhromadnosći a na turněrach. „W Nowej Wjesce su so hižo přeco wjesne škotowe turněry wotměwali, tam sym přeco rady sobu hrał. Hač w něhdyšich tobakowych halach, w bróžnjach abo garažach abo tež we wjesnym klubje – smy nimale wšudźe hrali“, Měrćin Nowak­ powěda.