Twar mole by mocy gmejny Halštrowska Hola přesahował

Hory (AK/SN). Planowanu molu w Parcowskim jězoru njebudźe gmejna Halštrowska Hola twarić, ale zaměrowy zwjazk Łužiska jězorina Sakskeje. „Wob­jim projekta by naše mocy přesahował. Tohodla smy wobšěrny twar a jeho rizika takrjec wotedali“, wjesnjanostka Halštrowskeje Hole Antje Gasterstädt (CDU) wčera na posedźenju gmejnskeje rady rozłoži. Jeje čłonojo su přinošk gmejny za zaměrowy zwjazk wobzamknyli. Wón wučinja za klětu 136 000 eurow a za lěto 2028 cyłkownje 119 000 eurow.

Mola ma dohromady něhdźe jědnaće milionow eurow płaćić. To je za jednotliwu komunu přewjele. Tohodla ma zaměrowy zwjazk projekt planować, zwoprawdźić a pozdźišo tež wobhospodarić. Za twar nadźijeja so 85 procentow spěchowanja. Wěste dźěle hodźeli so samo hač do 95 proc. spěchować, wčera na Horach rěkaše.