Šulerjo 12. lětnika Budyskeho Serbskeho gymnazija (SGB) su sej zhromadnje z tutorami swojeho lětnika na ekskursiju do Lipska dojěli. Wopytachu serbske studentske towarstwo Sorabiju a wotkrychu sej tójšto dalšich zajimawostkow.

Lipsk. Z ćahom su šulerjo a wučerjo póndźelu po wobjedźe do Lipska jěli, hdźež swoju ekskursiju z rallye po měsće zahajichu. Při tym widźachu stare město, uniwersitu a znate Awgustusowe naměsto. Mjeztym zo někotři uniwersitne město prěni raz wopytachu wužichu druzy móžnosć, sej je na hinaše wašnje wotkryć. Wječor mějachu šulerjo składnosć, so samostatnje po Lipsku pohibować.

Tři dny so šulerjo gymnazija w Lipsku ze stawiznami a kulturu NDR, ale tež z wědomostnymi temami zaběrachu. Młodostni wobdźělichu so na rozdźělnych wodźenjach a dźěłarničkach, mjez druhim na dźěłarničce we wobłuku MINT-programa. Skupina dósta při tym wobšěrniši dohlad do subkulturow NDRskeho časa. Tomu přidružichu so dalše wopyty wustajeńcow, kotrež skićachu rozdźělne perspektiwy na město, stawizny a přitomnosć.