Radwor (StŠ/SN). Hižo třeći raz bě towarstwo Cyrila a Metoda (TCM) běharki a běharjow sobotu, na dnju jednoty Němskeje, do Radworja přeprosyło. Mjeztym je běh wo pokal zbóžneho Alojsa wjace hač wólnočasne serbske katolske wubědźowanje. „Mějachmy nimo serbskich wobdźělnikow tež ludźi, kotřiž su z Pirny, Žitawy abo tež z Huskeje k nam dojěli a so sobu wubědźowali. Tež hdyž njeje to prěnjotny wotmysł, wjeselimy so wězo, hdyž naš běh tež druhich sportowcow z regiona přićehnje“, wjeseli so předsyda TCM Cyril Hančik nad wobdźělenjom.

Dohromady 144 wobdźělnikow bě sobotu po Radworju běžało. Na šěsć wšelako dołhi čarach, wot 500 metrow hač do 6000 metrow, so dźěći kaž tež dorosćeni wubědźowachu. „Wjedro běše krasne nazymske, nalada mjez wobdźělnikami bě wulkotna a fairna a přihladowarjo podłu čary pohonjowachu woprawdźe wšitkich. To běše wulkotne zarjadowanje – sportowje, ale tež z wida ekumeny“, Hančik z pokazom na dobyće serbskeje ewangelskeje fararki Jadwigi Malinkoweje w starobnej klasy žonow nad 40 lětami, ze posměwkom zjima.