W Slepom hakle nětko hospodarski plan za lěto 2026 wobzamknyli

Slepo (AK/SN). Planowanje přichodneho strowotniskeho centruma wostanje najwažniši nadawk Slepjanskeje gmejny. „Trjebamy we wjesnej kónčinje zawěsćene strowotniske zastaranje“, komornica Dana Piehl na zašłym posedźenju gmejnskeje rady wuzběhny, jako radźićeljo hospodarski plan za lěto 2026 jednohłósnje wobzamknychu.

Najebać napjatu cyłkownu situaciju, dokelž žane wulke rezerwy nimaja, chcedźa w gmejnje dale inwestować. Za to je 2,8 milionow eurow předwidźanych. Ćežišća­ su nimo strowotniskeho centruma šula a wohnjowe wobory. Na twarjenju Němsko-Serbskeho šulskeho kompleksa ma fotowoltaikowa připrawa nastać. Zo móhli na wyšej šuli přidatnu rjadownju wutworić, dyrbja swoje wuhotowanje rozšěrić a mjez druhim wjacore blida kupić.­