Wulki zajim na regionalnych powołanskich wikach w Ralbicach

Ralbicy (SN/StŠ). Wulki kran a traktor na dworje a nutřka w sportowej hali jedne stejnišćo po druhim – tež trěće regionalne powołanske wiki, kotrež přewjedźechu dźensa wot dopołdnja w Ralbičanskej šuli, běchu ze stron wopytowarjow kaž tež wustajerjow wospjet wuspěšne. „Sym wot wšeho spočatka tule přitomny. Njemóžu dochwalić, štož su zamołwići tu znowa na nohi stajili“, praji Krystof Rehor z Rehorec třěchikryjerskeje firmy z Konjec. „Tež, hdyž njeje lochko, młodych ludźi wo rjemjesle přeswědčić, maš přeco jednoho abo dweju, kiž matej woprawdźity zajim na dźěle a na wukubłanju pola nas w firmje. Tohodla přijědu přeco zaso rady na wiki.“