Beneficny koncert chóroweje akademije šwarnu sumu wunjesł

Budyšin (SN/bn). „Stwórba boža, templo swjaty“, prolog oratorija „Nalěćo“ Korle Awgusta Kocora a Handrija Zejlerja, tworješe zazběh beneficneho koncerta wčera w nimale połnje wobsadźenej Budyskej Michałskej cyrkwi. Jón wuhotowachu chórowa akademije serwisoweho kluba Rotary Bautzen/Budyšin, Serbska komorna filharmonija a spěwni solisća Romy Petrick, Maria Untchowa (wobě sopran), Marlen Herzog (alt), Mikołaj Walerych (ternor) a Clemes Heidrich (bas) pod cyłkownym nawodom Friedemanna Böhme. Prezidentka kluba Birgit Weber powita wopytowarjow wuzběhnywši, zo přewjedu koncert na dobro kampanje we wobłuku programa „Polio Plus“. Z njej angažujetej so zjednoćenstwo Rotary International a Swětowa strowotniska organizacija WHO pod hesłom „End Polio Now“ přećiwo spinalnej mortwicy (Kinderlähmung). W tym zwisku dźakowaše so wšitkim sobuskutkowacym za „znamjo solidarity a nadźije, kajkež tu ze zapalom a z prócu sadźiće“ a prošeše publikum wo šćedriwe dary.