Strowota njeje samozrozumliwa. Kóždy je wjesoły, hdyž ju ma. Što pak móžeš za swoju strowotu činić? Z tym zaběra so serija Serbskich Nowin, za kotruž wjacori awtorojo pisaja. (13)

Hdyž poradźuju nastupajo strowe zežiwjenju, słyšu časćišo argument, zo nimaja ludźo dosć chwile. Njemóžu tola telko časa w kuchni stać, zo bych sej wšitko čerstwje nawarił(a). Sym so hižo husto prašała, hač woprawdźe tomu tak je, zo woznamjenja strowje so zežiwić stajnje tež wjele časa za to nałožować. Měnju, zo tomu tak njeje.

Wuwažene zežiwjenje w prěnim rjedźe rěka, zestajeć sej swoju jědź wotměnjatu a wužiwać přirodne, čerstwe žiwidła. Wězo nochcemy kóždy dźeń syru morchej zrymzać abo suchu połnožitnu pomazku. Tohodla trjebamy kreatiwne recepty, štož pak njerěka, zo su komplikowane, abo zo jich přihotowanje mnoho časa rubi. Zeleninu a sad měli prawidłownje a wšědnje jěsć. Dołhodobnu energiju skića nam połnožitne produkty, kaž na přikład wowsne tružki, chlěb abo rajs. Z wažnymi bělkowinami zastaruja nas jejka, łušćinowe płody, ryba abo z rostlinow zhotowjene alternatiwy.