Worklecy (MČ/SN). We Worklečanskej Martinec pjekarni knježi mjeztym hižo dlěje hač měsacaj nowy rytmus. Přičina toho je jedna z najwjetšich inwesticijow minjenych lět, mjenujcy nowa, moderna elektriska pěc. Po něhdźe třitydźenskej fazy přetwara a saněrowanja w lěću zawod nětko zaso z połnej paru dźěła.

Wjele prócy bě trěbne, doniž njebě nowe srjedźišćo pjekarnje hotowe. Poprawom měješe přetwar dwě njedźeli trać. Dźěła pak běchu wobšěrniše. Tak su stary wuheń wotstronili a sćěny a wjerchi ponowili. W běhu třoch njedźel bě tole zmištrowane. Ale tež start z nowej pjecu njebě jednory. „Na spočatku sej my­slachmy, zo so to hnydom zešlachći. Tola po dwěmaj tydźenjomaj pječenja je so wuslědk hišće raz trochu změnił“, tak pjekarska mišterka a mějićelka Therese Martinowa. Tuž su temperaturu trochu přiměrili a pječenske časy přikrótšili. Po dalšich třoch tydźenjach nowa pěc skónčnje tak dźěłaše, kaž bě sej to pjekarka předstajiła.