W Ptačecach štwórć lětstotka wobstaća domizniskeje stwy woswjećili

Ptačecy. Z wulkim serbskim swjedźenjom su njedźelu w Ptačecach pola Wojerec 25lětne wobstaće Šulskeje a drastoweje stwy woswjećili a při tej składnosći nowu šulsku studničku poswjećili. Do toho pak swjećeše wosada w cyrkwi swjatočnu Božu słužbu na domchowanku z fararjom dr. Stefanom Reicheltom. Spěwna zhromadnosć z Ptačec zaspěwa pod nawodom Marije Šołćic serbske kěrluše. Nimo toho wobrubi kemše tež spěwna skupina Přezpólni, kotraž trójce zaspěwa. Hłownej organizatorce Martinje Pečikowej bě wažne, zo je serbšćina na kemšach sylnje prezentna. Tak běchu čitanje, spěwanje psalma a Wótčenaš serbsce słyšeć, štož wšak je za Ptačecy skerje njewšědne. Kěrluše spěwachu wotměnjejo so serbsce a němsce.