Strowota njeje samozrozumliwa. Kóždy je wjesoły, hdyž ju ma. Što pak móžeš za swoju strowotu činić? Z tym zaběra so serija Serbskich Nowin, za kotruž wjacori awtorojo pisaja. (13)
Dźensniši dźeń dožiwjamy, kak spěšnje so zdobyte žiwjenske nazhonjenja zaćisnu a zo nas syła informacijow, stres a strowotu wohrožace wobstejnosće přežaduja. W tajkich situacijach pyta čłowjek za spěšnje skutkowacymi pućemi abo srědkami, zo by narokam časa wotpowědował. Zela a dźiwje rostliny jako naše zelene pomocnicy móža nam na přirodne wašnje pomhać, zaso do runowahi přińć. Mjenuju tu někotre, kotrež maja za holcy a žony wuběrne kajkosće, zo bychu balansu w ćěle zaso docpěli. Jich spektrum je za wšitke starobne skupiny zajimawy.
