Přichodny tydźeń srjedu započnje so za Serbskopazličanske karnewalowe towarstwo mjeztym 55. karnewalowa sezona. Ta je z personalnymi změnami zwjazana. Towarstwo nawjeduje nětko 25lětny Lukas Wätzig.

Serbske Pazlicy. W nowej póstniskej sezonje Serbskopazličanskeho karnewaloweho towarstwa, kotraž so přichodny tydźeń srjedu w Njebjelčanskim gmejnskim zarjadnistwje z přepodaćom kluča a kasy započnje, wuhladamy wjacore nowe wobliča. Dotal su towarstwo předsyda Daniel Wätzig, jeho zastupjer Handrij Kurjat, pokładnica Sabine Hübenthalowa a zapisowar Carsten Wätzig nawjedowali. Prěni třo mjenowani su swoje dźěło złožili. Předsydstwo je nětko cyle w rukach Wätzigec swójby, kotraž wšak bě karnewal w Serbskich Pazlicach něhdy sobu załožiła. Nowy předsyda towarstwa je Lukas Wätzig, jeho nan Carsten je dale zapisowar. Mać resp. mandźelska Annett Wätzigowa je wotnětka pokładnica a Carstenowy bratr Enrico je nowy zastupowacy předsyda.