Na S 108 twarja puć, kolesowansku šćežku a móst nad Sprjewju

Łaz (AK/SN). Krajny zarjad za dróhotwar a wobchad (Lasuv) planuje wobšěrny wutwar statneje dróhi S 108 mjez Łazom a Běłym Chołmcom. Wotrězk rozpřestrěje so na dołhosći połdra kilometra wot kromy Łaza. Wot Třižonjanskeho jězora hač do Běłeho Chołmca natwarja podłu puća kolesowansku šćežku. Dale chcedźa nowy móst nad Małej Sprjewju twarić. Twarske dźěła zahaja za to srjedź fe­bruara přichodneho lěta. Po wšěm zdaću ma w juniju 2028 wšitko hotowe być. To je nowinska rěčnica Lasuv Nadine Franke zdźěliła.

Předwidźane naprawy su z někotrymi wužadanjemi zwjazane. Wšako dyrbja postajenja dodźeržeć, kotrež płaća za twarnišća při wodźe. Wo cyłkownych kóštach krajny zarjad žane informacije njepodawa. Swobodny stat Sakska pak wšitke wudawki zapłaći. Łazowska gmejna pomha jeničce při zawěsćenju wobjězdkow za zjawny bliskowobchad.