Miłoćicy (UG/SN). Wo zachowanje bohatosće družinow stara so projekt „Genressource Kernobst Lausitz“. „Stare jabłučiny a krušwiny słušeja přez generacije do kulturneje krajiny Łužicy. W nich tči wosebita genetiska mnohotnosć, kotraž ma so zachować. Wone njejsu jenož čwak stawiznow, ale drohotny žiwjenski rum za zwěrjata a rostliny“, piše koordinatorka projekta Ute Große z towarstwa Sakski krajny kuratorij za wjesny rum (SLK). Kuratorij na tutym polu zhromadnje z Juliusa Kühnowym institutom (JKI) w Drježdźanach dźěła. Wone zapisuja stare a za region typiske družiny jabłukow a krušwow Hornjeje Łužicy. Pytaja za městnosćemi, hdźež tajke steja, přepytaja kajkosće štomow a je do kartow zarysuja.





