Widejowa rozmołwa
Vatikan (B/SN). Nimale tři lěta po nadpadźe Ruskeje na Ukrainu je bamž Franciskus młodym Ukrainjanam we widejowej rozmołwje swoje sobučuće wuprajił. Wobdźěleni běchu ukrainscy młodostni z Kijewa a z dalšich europskich a ameriskich městow. Bamž přeje Ukrainje bórzomny měr, kotryž přez dialog nastanje, a namołwja młodostnych, so dale wo tajki dialog prócować.
Přećiwo diskriminaciji
Berlin (B/SN). Prezidentka Centralneho komiteja němskich katolikow Irme Stetter-Karp wumjetuje bamžej njestajny kurs napřećo žonam. Z pomjenowanjom sotry Raffaele Petrini za knježerstwowu šefinu we Vatikanje njejsu zakładne změny zaručene. „Trěbne je woprawdźite runostajenje splahow.“ Tuchwilu su katolske žony po jeje měnjenju diskriminowane, dokelž nimaja dowolnosć, měšniske nadawki wukonjeć.
Rozwjazanje mandźelstwow
EU reaguje na cła USA
Paris (dpa/SN). Wonkowny minister Francoskeje Jean-Noël Barrot je chłostanske cła Europskeje unije na wot prezidenta USA Donalda Trumpa wukazane nowe cła na wocl a aluminium připowědźił. „Njewahamy, hdyž dźe wo to, europske zajimy zakitować“, rjekny minister rozhłosownikam. Komisija EU chce přichodne dny nadrobnosće wobzamknyć. Trump je cła 25 procentow na importy wocla a aluminiuma postajił.
Kónc wójny hišće lětsa
Kijew (dpa/SN). Kónc wójny w Ukrainje je po słowach prezidenta Wolodymyra Zelenskeho „pod wěstymi wuměnjenjemi“ hišće lětsa móžny. K tomu słušeja wěstotne garantije za Ukrainu a wótriše sankcije přećiwo Ruskej, rozłoži Zelenskyj britiskim nowinarjam. Wosebje z pomocu noweho prezidenta USA Donalda Trumpa je kónc wójny móžny. Nětko dźe wo to, „horcu fazu wójny“ skónčić. Ruska je tuchwilu na wšitkich wotrězkach fronty wuspěšna.
Premier wólby dobył
Wjeršk z temu KI
Lindner za čorno-žołty zwjazk
Trump chce Gazaske pasmo kupić
Washington (dpa/SN). Prezident USA Donald Trump je swój wjele kritizowany plan, zo přewozmu USA Gazaske pasmo, potwjerdźił. W swojim lětadle Air Force One rjekny republikan wo pobrjóžnej kónčinje: „Smy rozsudźeni, kraj wobsedźeć a zaručić, zo so Hamas hižo njenawróći.“ Zwjazkowy kancler Olaf Scholz (SPD) mjenowaše předewzaće Trumpa, Palestinjanow z Gazaskeho pasma wusydlić a pobrjóžne pasmo na „rivieru Bliskeho wuchoda“ přetwarić, „hotowy skandal“.
Trump rjekny w lětadle k žurnalistam wo tym, zo chcył Gazaske pasmo kupić. Tež druhe kraje móhli dźěle pasma přewzać a wutwarić. Wo w Gazaskim pasmje bydlacych Palestinjanach wón twjerdźi, zo „nochcedźa“ tam wjace bydlić, wšako je kónčina wot bombow israelskich lětadłow dospołnje zničena.
Mjeztym je Egyptowska wjerškowe zetkanje arabskich statow zwołała. Palestinski prezident Mahmud Abbas bě wo to prosył. Wurjadne wuradźowanje ma so 27. februara w Kairu wotměć.
Europa we Łužicy
Płoty sadźenki w parku škitaja
Ludźo jědźa zaso wjace mjasa
Wiesbaden (dpa/SN). Produkcija mjasa w Němskej je po lěće 2016 zaso prěni króć přiběrała. Wotpowědnje ličbam Zwjazkoweho statistiskeho zarjada su w rězarnjach loni něhdźe 6,9 milionow tonow mjasa produkowali. To bě 97 000 tonow abo 1,4 procenty wjace hač 2023.
Hłowny jednaćel zwjazka mjasoweho hospodarstwa Steffen Reiter ma najnowše ličby za pokazku na zasadnu změnu wuwića: „Ludźo jědźa zaso wjace mjasa.“ Napinanja a inwesticije ratarstwa a mjasoweho hospodarstwa nastupajo škit klimy a skotu su so zadanili.
Što pak su přičiny noweho wuwića? Hospodarski fachowc slědźenskeho instituta YouGov Robert Kecskes wobkedźbuje změnu zwučenosćow. „Wulki trend k weganym a wegetariskim wudźěłkam je swój rozmach zhubił, tež mjez młodymi ludźimi.“ Runočasnje so přetrjeba mjasa stabilizuje. Mnozy drje mjenje mjasa jědźa. Zdobom su pak zwólniwi, wjace pjenjez za nje wudawać a produkty z wysokej hódnotu kupować. „Mjaso ma mjez ludźimi zaso wjetšu hódnotu“, tak slědźer wičnych zwučenosćow. Woprawdźitu změnu zwučenosćow wšak Kecskes njewidźi. Wón je sej wěsty, zo je kwalita mjasa dźeń a wažniša.
To a tamne (10.02.25)
Pod Nutellu hišće butru abo nic? Tute prašenje njeje zwjazkowemu kanclerej Olafej Scholzej scyła wažne. „Zwjetša scyła njesnědam“, wotmołwi politikar SPD na prašenje šulerja na zarjadowanju we wobłuku wólbneho boja w Ludwigsburgu. Z Nutellu Scholz tak a tak wjele započinać njemóže: Wot swojeho dwanateho žiwjenskeho lěta wón tule šokolodźanu pomazanku njewužiwa.
Snadny wothłós je njewšědna akcija wólbneho boja Berlinskeho politikarja Lasse Hansena (27) žnjała. Minjenu sobotu chcyše wón w hosćencu w stolicy tysac Cheesburgerow předać a sej za kóždy runje jedyn cent žadać. Planowany nawal kaž něhdy pola Lukasa Podolskyja w Kreuzbergu pak wuwosta: Po informacijach Hansena su 400 Cheesburgerow rozdawali. Reporterojo nowiny B.Z., kotřiž su wo kurioznej akciji rozprawjeć chcyli, tole wobkrućić njemóžachu.
Lindner za zhromadny koncept
Berlin (dpa/SN). W dale trajacej debaće wo migraciji je předsyda FDP Christian Lindner „strony přesahowace dojednanje“ nastorčił, zo by AfD „pomjeńšił“. We wusyłanju ZDF wón namjetowaše, žadanja CDU/CSU a koncepty SPD a Zelenych do cyłka zwjesć a wobzamknyć. „Ze swěčkami AfD njepomjeńšimy“, Lindner namołwješe. „Tole so jenož poradźi, hdyž zmištrujemy skónčnje problemy, kotrež su tule stronu wulku sčinili.“
Redukuje ličbu přistajenych
Washington (dpa/SN). Za ameriski wuwićowy zarjad USAID ma přichodnje jenož hišće něšto stow přistajenych dźěłać. Knježerstwo prezidenta Donalda Trumpa chce ličbu zastojnikow wot wjace hač 10 000 na něhdźe 290 městnow znižić, New York Times rozprawja. Trump bě hižo w januarje etat institucije blokował. Wospjet wón rjekny, zo nawjeduja USAID „radikalni błudni“, kotřiž dawkowe pjenjezy Američanow broja.
Zelenskyj chce ruske pjenjezy
