Tilich rasizm raznje zasudźił
Drježdźany (dpa/SN). Sakski ministerski prezident Stanisław Tilich (CDU) je hladajo na najnowše protesty přećiwo wukrajnikam hidu a namóc raznje zasudźił. „Rasizm je hańba. Rasizm je wuchadźišćo złóstnistwow“, rjekny wón dźensa we wobłuku swojeje knježerstwoweje deklaracije w Sakskim krajnym sejmje. Nichtó njesměł so wotwobroćić. „Wočakuju, zo so wšitcy w swobodnym staće tajkim zjawam energisce spjećuja.“ Ludźo na ćěkańcy před wójnu a katastrofami měli so w Sakskej přiwzać. „Woni maja prawo na fairne azylowe jednanje“, Tilich zwurazni. Zdobom pokaza na šansy připućowanja. „Hdyž so integracija derje zmištruje, je wona wobohaćenje.“
Zeleni čušlenja dla chětro rozhorjeni
Njedźela rozsudna
Wočakuja namjety Athenskeho knježerstwa
Brüssel (dpa/SN/K). Za Grjeksku je dźensniši štwórtk posledni termin, reagować na namjety za lutowanje. Njedyrbjała-li financnym ministram tamnych eurokrajow hač do połnocy nadrobna lisćina z Athena předležeć, njedóstanu tam prawdźepodobnje žadyn nowy pomocny paket. Próstwu wo nowe kredity po miliardach je grjekske knježerstwo mjeztym wuchowanskemu krywej eura (ESM) zapodało. Jenož hdyž lisćina z přihłosowanjakmanymi reformami w poslednjej chwili dóńdźe, móhł wurjadny wjeršk EU njedźelu dalše pjenjezy při- zwolić. Hewak hrozy t. mj. „Grexit“.
Putin chcył wuše styki z krajemi BRICS
Dźeń a mjenje ludźi w Sakskej
Přichodne dny žadyn stawk
Frankfurt n. M. (dpa/SN). Dźěłarnistwo pilotow Cockpit nochce – hinak hač připowědźene – přichodne dny stawkować. Najprjedy měła tarifowa komisija wuradźować a po tym čłonow dźěłarnistwa wotpowědnje informować, rěčnik Cockpita Markus Wahl wčera powěsćerni dpa zdźěli. Tole wěsty čas traje. Dokładne informacije k móžnemu terminej přichodneho stawka wón njepoda. Wot apryla 2014 běchu piloća dotal dwanaće króć stawkowali a předewzaću Lufthansa wjace hač 300 milionow eurow škody načinili. Dźěłarnistwo je wčerawše jednanja z Lufthansu jako zwrěšćene deklarowało. Dźěłarnistwo Ufo přihotuje porno tomu tarifowe jednanja za sobudźěłaćerjow w kabinach lětadłow. Wone zastupuje 19 000 přewodźerjow w mašinach. Njebudu-li tarifowe jednanja wuspěšne, chce tež personal stawkować.
Dźěłowy bój připowědźa so tež pola britiskeho tunjeho lětanskeho předewzaća Easyjet. Přichodny tydźeń chcedźa tam rozsudźić, hač dźěło złoža. Stawk by w prózdninach razne wuskutki měł.
Kritizuja załožbu wuhnatych
To a tamne (09.07.15)
Štyri pilatka je policija na awtodróze A 5 pola Freiburga wuchowała. Šoferojo awtow su mortwu kačku, kotruž drje běchu přejěli, na kromje jězdnje wuhladali. Najebać sylny wobchad młode kački stajnje zaso spytachu, k swojej mortwej maćeri na srjedźnym pasmje awtodróhi dóńć. Policija so skónčnje wo pilatka staraše a dowjeze je do zwěrjatownje.
Na hród Hartenfels w Torgauwje stej mjedwjedźej Bea a Benno dojěłoj. Přiwjezli běchu jej minjenu nóc ze Sewjerorynsko-Westfalskeje do sewjerosakskeho města, kaž krajnoradny zarjad zdźěla. Přichodne dny matej so mjedwjedźej najprjedy na swoju nowu wokolinu a na tam bydlacu mjedwjedźicu Jette zwučić. Jeje partnerka Quistel bě kónc meje zemrěła. Tohodla pytachu za nowymi zwěrjatami. W Hartenfelsu dźerža mjedwjedźe wot lěta 1425.
Łužica (09.07.15)
Woheń w milinarni
Picnjo (dpa/SN/ch). W Janšojskej milinarni je so paliło. Njeje hišće jasne, čehodla bě woheń w transformatoru wudyrił, zdźěli energijowy koncern Vattenfall w Choćebuzu. Wohnjowym wobornikam so spěšnje poradźi płomjenja zha- šeć. Nichtó njebu zranjeny. Blok B milinarnje njemóže snano tři tydźenje dołho dźěłać. Janšojce jako najwjetša brunicowa milinarnja Němskeje je dźěło lěta 1981 zahajiła a ma elektriski wukon 3 000 megawattow. Paliwo pochadźa z wuhloweju jamow Janšojce a Choćebuz-sewjer. Vattenfall wudźeržuje cyłkownje štyri brunicowe milinarnje w Braniborskej a Sakskej.
Natoča dalši błótowski krimi
Wobstejnosće maja so změnić
Rada za serbske naležnosće Braniborskeje je wčera w Podstupimje mjez druhim njespokojnosć nad tym zwurazniła, zo njeje ewaluacija projekta Witaj přeco hišće zahajena.
Podstupim (SN/JaW). Rada za serbske naležnosće Braniborskeje chce ramikowe wobstejnosće nastupajo wuběrk za wólby serbskeje rady změnić. Na to dojednachu so čłonojo gremija na swojim wčerawšim posedźenju w Podstupimje. Kaž zdźěli městopředsyda serbskeje rady Marcus Kóńcaŕ, chce rada w septembrje zhromadnje z wólbnym wuběrkom a braniborskim nutřkownym ministerstwom wólby hišće raz wuhódnoćić. Pozadk bě kritika na financowanju wólbnych přihotow. „Čłonojo wuběrka su wulki dźěl kóštow najprjedy ze swojeho zaka płaćili, štož wězo njeńdźe. Měli tuž předewšěm při financowanju a zasadźenju dźěłowych mocow w běrowje wólbneho wuběrka nowe rjadowanje namakać, na přikład z krutym budgetom“, Kóńcaŕ potwjerdźi.
