Krótkopowěsće (27.01.20)
W muzeju kwasowali
Drježdźany. Dźěći a starši towarstwa Stup dale z. t. w Drježdźanach swjećachu sobotu ptači kwas a pokazachu swój program něhdźe 200 ludźom w foyeru tamnišeho měšćanskeho muzeja. Při woblěkanju serbskeje katolskeje narodneje drasty je staršich towarstwa Kristin Belkotowa z Hózka podpěrała. Program nazwučowali běchu we wobłuku dźěłoweho zjednoćenstwa „Serbšćina“.
Brošurka přepodata
Worklecy. Brošurku „Moje wukubłanje“ su Marija-Tereza Krawžic, Marija Koklina, socialna dźěłaćerka za młodźinske socialne dźěło Rěčneho centruma WITAJ, a Pětr Brězan, referent za hospodarske a infrastrukturne naležnosće Domowiny, pjatk we Worklečanskej wyšej šuli přepodali. Domowina bě 124stronsku ediciju k powołanskej orientaciji loni w nakładźe 300 eksemplarow wudała.
Kobe Bryant mjez woporami
Krótkopowěsće (24.01.20)
Měšćanske dwórnišćo přepodate
Budyšin. Modernizowane Budyske dwórnišćo staj inwestoraj Jörg Drews a Gerald Lucas w přitomnosći zastupjerjow krajneho zjawneho žiwjenja dźensa swjatočnje přepodałoj. Zaměstnjene su tam nowa wotnožka krajnoradneho zarjada ze socialnym a młodźinskim zarjadom, kofejownja, předawarnja jězdźenkow, wobchadny zwjazk ZVON a chorobna kasa Barmer. Ludnosć bě popołdnju na wotewrjenje přeprošena.
Gudrun Pausewang njeboh
Bamberg. Awtorka knihi „Die Wolke“ Gudrun Pausewang je wčera 91lětna zemrěła. W romanje „Mróčel“ (1987) wopisuje wona dóńt młodostneje po atomowej katastrofje w němskej milinarni. Pausewang je wjace hač 90 knihow wozjewiła a bu w 2017 z Němskim mytom za młodźinsku literaturu za swój žiwjenski skutk wuznamjenjena.
Srědki za Lessingowy gymnazij
Krótkopowěsće (23.01.20)
Jury so skonstituowała
Drježdźany. Nowopowołana jury za Myto za serbsku rěč – Zejlerjowe myto je so wčera w Drježdźanach skonstituowała. Rada za serbske naležnosće, Zwjazk Łužiskich Serbow Domowina, Serbski institut, Budyski a Zhorjelski wokrjes, gmejny serbskeho sydlenskeho ruma a sakske ministerstwo za wědomosć, kulturu a turizm běchu za nju stajnje po jednym čłonu namjetowali.
Lessingowe akcenty zahajene
Kamjenc. Na wčerawšich narodninach Gottholda Ephraima Lessinga su w Kamjencu Lessingowe akcenty z čitanjom žurnalista Alexandera Osanga z Berlina zahajili. Tamniši Lessingowy muzej poskići hač do spočatka měrca dwanaće zarjadowanjow w tym wobłuku. Kóžde lěto wotměnjeja so wjetše Lessingowe dny a mjeńše Lessingowe akcenty.
Předadźa lěsy w Němskej?
Aš. Najzapadniše čěske město Aš wobsedźi historisce tež něhdźe 20 hektarow lěsow na němskej stronje mjezy. Dokelž je tak ćežko je wobhospodarjeć, chcyli tamniši zamołwići lěsy předać. Tale mysl złožuje so zdobom na fakt, zo su ležownostne płaćizny w Němskej wyše hač w Čěskej republice.
Krótkopowěsće (22.01.20)
Počesća Kurta Biedenkopfa
Drježdźany. Ze swjedźenskim zarjadowanjom w Drježdźanskej cyrkwi Našeje knjenje chce Konrada Adenauerowa załožba přichodnu wutoru politikarja unija Kurta Biedenkopfa počesćić, kiž tón dźeń 90. narodniny swjeći. Na zarjadowanje wočakuja tež zwjazkowu kanclerku Angelu Merkel (CDU). Křesćanski demokrat Biedenkopf bě wot lěta 1990 do 2002 ministerski prezident Sakskeje.
Dwě stejnišći poskićiło
Choćebuz. Město Choćebuz je Zwjazkowej centrali za politiske kubłanje dwě stejnišći – při nastawacym Wuchodnym jězoru abo na arealu bywšeho jastwa na Budyskej dróze – poskićiło, hdźež móhła wona nowy fachowy wobłuk wutworić, kaž wčera z radnicy rěkaše. Zwjazkowy zarjad chce nowy wobłuk za transformaciske procesy zarjadować, pak w Choćebuzu pak w Halle nad Solawu.
Na Dnju susodow so wobdźělić
Krótkopowěsće (21.01.20)
Čitajo sej swět wotkrywać
Lipsk. Pod hesłom „Wotkrywacy swěta“ přeprošeja Lipšćanske wiki lětsa wot 12. do 15. měrca dźěći, młodostnych, staršich a pedagogow na něhdźe 500 wosebitych zarjadowanjow, hdźež móža sej čitajo swět wotkrywać. Lipšćanske płaća jako najwjetše wiki za spěchowanje čitanja a čitanskeje kompetency w němskorěčnym rumje.
Tež Židźinscy spěwarjo pódla
Wojerecy/New York. Wulki chór Wojerec a dalši spěwarjo z wokoliny města – mjez nimi su tež čłonojo chóra Židźino a jeho wuměłstwowa nawodnica Kerstin Lieder – přebywaja tuchwilu w New Yorku. Z dalšimi chóristami ze wšeho swěta, dohromady bě jich 279, předstajichu woni wčera w sławnej Carnegie Hall twórbu Sira Karla Jenkinsa „The Armed Man, A Mass for Peace“.
Z biskopom swjećili
Krótkopowěsće (20.01.20)
Nowy předsyda
Róžant. Zwjazk CDU gmejny Ralbicy-Róžant ma nowe předsydstwo. Pjatk su w Róžeńće Eduarda Luhmanna za předsydu wuzwolili. Wón naslěduje Tila Žura. Za naměstnika wuzwolichu Dawida Statnika, pokładnica je dale Halena Jancyna, nowy zamołwity za čłonow je Tilo Žur. Za najwažniši nadawk w gmejnje nowy předsyda ma, zwoprawdźić nowotwar Ralbičanskeje pěstowarnje.
Přebywanišćo wuznamjenili
Huska. Kubło Sommereichen w Husce je najwoblubowaniši dowolowy statok Sakskeje. Wotpowědny pječat dósta mějićelka přebywanišća w Budyskim wokrjesu Erika Busch sobotu na Zelenym tydźenju w Berlinje. Wuznamjenjenje spožča nakładnistwo znateho časopisa LandLust, kotrež kóžde lěto za dowolowymi statokami a wosebitymi kwartěrami we wjesnych kónčinach pyta.
Do šule hakle w dźewjećich?
Krótkopowěsće (17.01.20)
Za Grimmowe myto nominowany
Marl. Dokumentaciski film Grit Lemke „Gundermann Revier“ je za Myto Adolfa Grimma nominowany. Najwažniše němske telewizne myto spožča mjeztym 56. raz, a to 27. měrca w štyrjoch kategorijach. Hižo 3. měrca chcedźa lawreatow wozjewić. Debitowy film kuratorki sekcije „Heimat – Domownja – Domizna“ na Choćebuskim filmowym festiwalu dr. Grit Lemke bě loni tež tam widźeć.
Zastojnstwje dale wjedźe
Drježdźany. Serbskemu zapósłancej Alojsej Mikławškej (CDU) su na konstituowacym posedźenju noweho etatoweho a financneho wuběrka Sakskeho krajneho sejma znowa zastojnstwo zastupowaceho předsydy dowěrili. Nimo toho přisłuša Worklečan dale peticiskemu wuběrkej, kaž jeho wobydlerski běrow w Kamjencu informuje.
Nowy běrow koordinowanišća
Krótkopowěsće (16.01.20)
Naćisk ministra wotpokazany
Berlin. Organy darować je w Němskej tež přichodnje jeno z wuraznej dowolnosću móžno. Zwjazkowy sejm je dźensa naćisk skupiny zapósłancow wokoło ministra za strowotnistwo Jensa Spahna (CDU) wotpokazał. Spahn chcyše, zo je kóždy wobydler awtomatisce darićel, jeli so tomu wuraznje njespjećuje. Wjetšina zapósłancow sejma pak po emocionalnej debaće přećiwo tomu hłosowaše.
Nowa referentka
Drježdźany. Dr. Madlena Malinkec dźěła wot wčerawšeho w sakskim statnym ministerstwje za wědomosć, kulturu a turizm jako referentka za serbske naležnosće, a to hromadźe z dotalnym referentom Stanisławom Brězanom. Předsyda Domowiny Dawid Statnik je Madlenje Malinkec „k wobsadźenju wažneho městna“ gratulował.
Dom ze 17. lětstotka wuslědźili
Krótkopowěsće (15.01.20)
Předsydari mjeńšinowej radźe
Budyšin. Předsyda Domowiny Dawid Statnik přewozmje lětsa tež předsydstwo mjeńšinoweje rady, wozjewi wčera mjeńšinowy sekretariat w Berlinje. Statnik naslěduje Dana z Južneje Schleswigskeje Jona Hardona Hansena, kiž je gremij po wjelelětnym angažemenće wopušćił. Prěnje posedźenje z nowym předsydu budźe 10. februara w Berlinje.
Solarny park LEAG dźěła
Choćebuz/Wjelcej. Prěni swójski solarny park energijoweho koncerna LEAG je kónc lěta 2019 dźěłać započał, kaž předewzaće dźensa zdźěli. Fotowoltaikowu připrawu „Wjelcej III“ z kapacitu dźesać megawattow je koncern loni na swójskich płoninach na lětanišću Wjelcej natwarił. Nazhonita firma „juwi“, kotraž bě tam hižo dwě solarnej připrawje stajiła, je tež nowu připrawu LEAG natwariła.
Manewer tema w krajnym sejmje
Krótkopowěsće (14.01.20)
Najlěpši lokal wuznamjenjeny
Zhorjelc. Najwoblubowaniši hosćenc Hornjeje Łužicy je Łutowska „Sakska stwička“. Dobyćerja wubědźowanja wo najlěpši lokal su wčera w Zhorjelcu wuznamjenili. Druhe městno docpě Rachlowska „Chěžkarska korčma“ a třeće Žitawski hosćenc „Mister Bales“. Budyska kofejownja „Nähcafé Lotte“ wjeseleše so nad pjatym městnom.
Klimowa hysterija – njesłowo 2019
Darmstadt. Zapřijeće „klimowa hysterija“ je „njesłowo lěta 2019“. Z nim so prócowanja wo lěpšu klimu a hibanje za jeho škit wočornjeja a wažne debaty wo tym diskredituja, zdźěli rěčnica jury w Darmstadće. Wuraz běchu zastupnicy politiki, hospodarstwa a medijow wospjet wužiwali, mjez druhim wodźacy politikar AfD Alexander Gauland.
Wjace ćěkancow-wučomnikow
