Policija (03.02.16)
Wšitke kolesa fuk
Nowa Wjes. Štož drje je za kóždeho wobsedźerja awta trašacy són, sta so wčera rano za młodeho muža w Nowej Wsy pola Rakec struchła woprawdźitosć. W nocy do toho běchu so njeznaći z jeho Audijom, kotryž steješe na Kaponicowej wonka na parkowanišću, „bliže zaběrali“. Jako chcyše 26lětny krótko do 5 hodź. na dźěło wotjěć, nochcyše swojimaj wočomaj wěrić. Njeznaći běchu awtu wšitke štyri kolesa wotšrubowali a jězdźidło na kamjenje wotstajili, byrnjež aluminijowe zwjena ze zymskimi wobručemi z wosebitym zamkom zawěsćene byli. Cyłkowna škoda wučinja něhdźe 1 600 eurow. Policija za paduchami pyta.
Policija (02.02.16)
Budyšin. Žanu šansu přećiwo fitnosći policajskich zastojnikow njeměješe zawčerawšim wječor wodźer Mazdy na Budyskej Stieberowej, hdźež chcychu jeho policisća krótko do 20 hodź. kontrolować. Wón drje najprjedy z awtom zasta a tež wulěze, na to pak pěši ćekny. Zastojnicy jeho po krótkim přesćěhanju dosahnychu, byrnjež so přećiwo tomu wobarał. Spěšnje bě tež jasne, čehodla so muž kontrolować dać nochcyše. Při tesće z alkomatom wujewi so pola njeho 1,66 promilow alkohola w kreji. Zastojnicy sej tuž jeho jězbnu dowolnosć hnydom wobchowachu. 52lětny šofer awta změje so nětko jězdźenja pod wliwom alkohola dla runje tak zamołwić kaž wobaranja přećiwo policajskim zastojnikam dla. W chorowni su jemu pozdźišo probu kreje brali. Statne rěčnistwo so nětko z tymle padom dale zaběra.
Policija (01.02.16)
Miłoćicy. Tójšto škody načinichu paduši w nocy na sobotu w Miłoćicach. Tam je so priwatny zawod z woporom njeznatych stał. Kaž policija zdźěli, zalězechu skućićeljo na třěchu běrowoweho twarjenja, hdźež rozbichu třěšne wokno a so tak do twarjenja dóstachu. W domje wjacore durje do jednotliwych rumnosćow namócnje wočinichu. Pokradnyli su njeznaći někotre mobilne telefony, laptop a pjenjezy. Cyłkownu hódnotu rubizny trochuja mějićeljo na něhdźe 1 900 eurow. Na třěšnym woknje kaž tež na durjach nasta dohromady 1 800 eurow škody. Policija je slědy zawěsćiła a pyta nětko za paduchami.
Policija (29.01.16)
Wojerecy. „Staroba njeje přeco najmudriša“ móhło hesło policajskeho zasadźenja zawčerawšim we Wojerecach rěkać. Tam bě 78lětny muž krótko po 10 hodź. ze swojim Mitsubishijom wotzady do Opela zrazył. Při wobdźěłanju njezboža napadny policistam „chorhojčka“ rentnarja, pola kotrehož naměrichu na to 2,14 promilow alkohola w kreji. Byrnjež jemu jězbnu dowolnosć sćazali, wuhladachu njepolěpšomneho krótko po tym znowa ze swojim awtom jěć. Po wšěm zdaću jemu wědome njebě, zo wospjet předpisy nadróžneho wobchada zanjecha. Tónraz pak zastojnicy hnydom klučik jeho awta sćazachu.
Policija (28.01.16)
Žitawa. Po tym zo bě so 20. januara we wjaceswójbnym domje w Žitawje paliło a wobydlerjo z njeho wućahnyć dyrbjeli, su so tam nětko paduši zadobyli. W času wot póndźele připołdnja hač do wutory ranja woni durje do wjacorych bydlenjow namócnje wočinichu a pokradnychu pjenjezy, debjenki, kompjutery a domjacu elektroniku. Kotru hódnotu rubizna ma, njeje hišće zwěsćene, wěcna škoda pak wučinja wjace hač tysac eurow.
Policija (27.01.16)
Njedźichow. Njeznaći chcychu so zawčerawšim připołdnju do bydlenja w Njedźichowje zadobyć. Dokelž pak pos 30lětneje wobydlerki, kotraž bě tohorunja w bydlenju, šćowkać započa, so skućićeljo zminychu. Kaž so wukopa, wužiwachu woni originalny kluč bydlenja. Tón bě 30lětna loni něhdźe zhubiła, zamki durjow pak njeje dotal wuměnić dała.
Policija (26.01.16)
Budyšin. W nocy na póndźelu wołaše wodźer nakładneho awta z parkowanišća při awtodróze A 4 policiju wo pomoc, dokelž spytachu njeznaći z jeho jězdźidła diesel wotklumpać. Jako pytnychu, zo bě jich 54lětny lepił, woni ze swětłym Fiatom ćeknychu. Wjacore wobsadki policajskich awtow na to za w Pólskej přizjewjenym Fiatom pytachu. Při awtodróhowej wotbóčce Budyšin-wuchod jón skónčnje zadźeržachu. Při kontroli zwěsćichu nimo třoch sobujěducych w starobje 32, 28 a 17 lět wjacore kanistry z dieselom, koleso a wjacore awtowe kolesa. Po wšěm daću pochadźeja tele wěcy z padustwow, štož nětko přepytuja.
Policija (25.01.16)
Porchow. Njeměrny wječor mějachu minjeny pjatk wobornicy w Porchowje. Tam bě we wuhenju bydlenskeho domu woheń wudyrił. Mjeztym zo tam spočatnje jenož škrički k njebju stupachu, poł hodźiny po alarmowanju wobory hižo płomjenja z wuhenja sapachu. Nimale 50 kameradow z Porchowa, Hornjeho Wujězda a z Wulkeho Wosyka bě zasadźenych. Wětřika dla bě ćežko płomjenja podusyć. Zo móhli lěpje hašeć, wołachu tež hišće jězdźidło z wjerćitym rěblom Biskopičanskeje wohnjoweje wobory k pomocy. Saznik wobornikow při hašenju podpěrowaše. Hakle po třoch hodźinach bě woheń doskónčnje zhašeny. Zranił so na zbožo nichtó njeje.
Policija (22.01.16)
Słona Boršć. Na nuzniku awtodróhoweho wotpočnišća Hornja Łužica pola Słoneje Boršće je tamniši sobudźěłaćer zawčerawšim tobołku z wosobinskimi dokumentami a 500 eurami namakał. Sprawny namakar přepoda wšitko zastojnikam awtodróhoweje policije. Z dokumentami w tobołce wuslědźichu woni firmu w Litawskej, kotraž informowaše swojeho šofera. Tón ani hišće pytnył njebě, zo tobołu wjace nima. Nablaku so wón zawróći a sej ju pola policije wotewza.
Policija (21.01.16)
Rozwodecy. Hładke puće su wčera wječor w Hornjej Łužicy wjacore wobchadne njezboža zawinowali. Jedne sta so krótko do 23 hodź. na statnej dróze S 116 mjez Rozwodecami (Rodewitz) a Korzymjom. Tam zhubi wodźer Toyoty kontrolu nad swojim awtom, zrazy na prawym boku najprjedy do sćežora nadróžneho wobswětlenja a na to z lěwym bokom jězdźidła do štoma. Hakle přiwołana dobrowólna wohnjowa wobora móžeše muža z jězdźidła wuswobodźić. Jeho dyrbjachu zranjeneho do Budyskeje chorownje dowjezć.
