Krótkopowěsće (05.12.16)

póndźela, 05. decembera 2016
artikl hódnoćić
(0 )

Milan Hrabal z nowostki čitał

Praha. Składnostnje stotych narodnin Jurja Brězana čitaše Varnsdorfski spisowaćel Milan Hrabal sobotu w Praskim Serbskim seminarje ze swojeje nowostki „Přiběhy o vodě“. Zakład knihi je němskorěčna publikacija Brězana „Geschichten vom Wasser“, kotruž bě wón zhromadnje z nawodnicu Varnsdorfskeje biblioteki Ilonu Martinovskej přełožił.

Basnje wo słowjanskim herbstwje

Neustadt an der Orla. Publicist dr. Baal Müller z Treuenbrietzena je pod hesłom „Wendische Fahrt“ basnje wo słowjanskim herbstwje wozjewił. Jedyn kapitl knihi, kotruž je nakładnistwo Arnshaugk w Neustadće an der Orla wudało, wěnuje so tež Łužicy. Baal Müller angažuje so na polu słowjanskeho pohanstwa.

Šiman za razniše kontrole

Budyšin. Zapósłanc CDU w Sakskim krajnym sejmje Marko Šiman žada sej hnydomne naprawy přećiwo organizowanym cwólbam, kotrež ludźi ilegalnje do Europy pašuja. Tak měli so po wšej Europje zaso pomjezne kontrole dołhodobnje zawjesć. „Njemóžemy so na Schengenski rum spušćeć“, rěka w pjatk wozjewjenej zdźělence Šimana.

wozjewjene w: Krótkopowěsće
Prošu přizjewće so, chceće-li komentar podać

Serbska debata

nowostki LND