Krótkopowěsće (16.03.17)

štwórtk, 16. měrca 2017
artikl hódnoćić
(0 )

Ličba zatepjenych so podwojiła

Berlin. Ličba ludźi, kotřiž su so loni w Sakskej zatepili, je so porno lětu 2015 na 15 nimale podwojiła. Wo tym informuje dźensa Němska towaršnosć za wuchowanje žiwjenja DLRG w Berlinje. Po cyłej Němskej je ličba smjertnych woporow loni na dohromady 537 rozrostła, najwjace w zašłych dźesać lětach.

Wudobywanje brunicy wina

Choćebuz Kaž Choćebuske krajne sudnistwo wčera rozsudźi, bě wudobywanje brunicy na tym wina, zo je 20 štomow zahinyło. Skoržiła bě swójba, kotraž bydli na kromje Janšojskeje brunicoweje jamy. Kelko pjenjez ma nětko jako wotrunanje za štomy wot wobhospodarjerja jamy dóstać, hišće jasne njeje.

Pismik „ř“ tola wostanje

Praha. Čěski senator Jaroslav Doubrava wuraznje na Facebooku kritizuje pozdatny namjet Europskeje unije, pismik „ř“ z alfabeta europskich rěčow šmórnyć. Přičina měło pječa zjednorjenje snadneho wustupowanja tohole pismika być. Hakle reakcije čitarjow na Facebooku senatorej wuwědomichu, zo je so wot hižo staršeje satiriskeje fiktiwneje powěsće za nós wodźić dał.

Chcedźa Thiaga wróćo měć

Barcelona. Španiski radijowy sćelak Cadena SER je wčera rozprawjał, zo chce španiski koparski klub FC Barcelona srjedźopólneho hrajerja Thiaga Alcántaru wot FC Bayerna Mnichow zaso wróćo kupić. W lěću chcedźa Katalanojo za 25lětneho poskitk wotedać. Lěta 2015 bě Thiago, kiž ma z Bayerami hišće zrěčenje hač do 2019, wot FC Barcelony k Bayernej Mnichow přišoł.

Dočasny kónc

Indian Wells. Němski tenist Alexander Zverev je na turněrje ATP masters 1000 w Indian Wellsu hižo w třećim kole přećiwo youngsterej Nickej Kyrgiosej z Awstralskeje 3:6 a 4:6 přěhrał. Tež Angelique Kerber dyrbješe so Rusowce Jelenje Wjesninej dwójce z 3:6 kłonić. Kerber, kotraž bě na twjerdym hrajnišću po štyrjoch lětach zaso raz pod najlěpšimi 16 tenistkami, podleža Wjesninej po 1:24 h.

wozjewjene w: Krótkopowěsće
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND